६ साउन,
विराटनगर÷ वीपी कोइरालाको विचार र सिद्धान्तलाई नेपाली कांग्रेसले भुल्दै गएका कारण पार्टी कमजोर हुँदै गएको एक कार्यक्रमका वक्ताहरुले बताउनु भएको छ् ।
वीपी कोइरालाको ४३ औं स्मृति दिवसका अवसर पारेर नेपाली कांग्रेस मोरङले आयोजना गरेको कार्यक्रममा बोल्ने वक्ताहरुले वीपीको आदर्श, सिद्धान्त र विचारलाई आत्मसाथ गरेर अगाडि बढे कांग्रेसलाई कसैले हराउन नसक्ने दाबी गर्नु भयो । कार्यक्रममा नेपाली कांग्रेसकी केन्द्रीय सदस्य डा. डिला संग्रौलाले वीपीले अघि सारेको राष्ट्रियता, लोकतन्त्र र समाजवादको सिद्धान्तलाई कांग्रेसले भुलेको बताउनुभयो ् ।
वीपीको सिद्धान्त र आदर्श भुलेकै कारण कांग्रेसभित्र व्यक्तिवादी प्रवृत्ति हाबी हुँदै गएको उनको भनाइ थियो । गरिबको जीवनस्तर उठाउन वीपीले देखेको सपना अझै साकार नभएको संग्रौलाले बताउनुभयो । अहिले पार्टीभित्र र सत्तामा सुकिलामुकिलाहरुकै दबदबा रहेको उहाको गुनासो थियो ।
कांग्रेस केन्द्रीय सदस्य अमृत अर्यालले अब कांग्रेसलाई नयाँ सोच र विचारबाट अगाडि बढाउनु आवश्यक रहेकोमा जोड दिदै वीपीले अघि सारेका आदर्श, विचार र सिद्धान्तलाई मात्रै आत्मसाथ गरे कांग्रेसले जुनसुकै निर्वाचनमा पनि सहज रुपमा जित हासिल गर्ने बताउनभयो । कांग्रेसले कांग्रेसलाई हराउन लाग्दा पार्टीसमेत कमजोर भएको अर्यालको टिप्पणी थियो ।
अर्का केन्द्रीय सदस्य भीम पराजुलीले वीपीले प्रतिपादन गरेका सिद्धान्तलाई व्यवहारमा उतार्नुपर्नेमा जोड दिनुभयो ।
कोशी प्रदेशका पूर्वमुख्यमन्त्री केदार कार्कीले पार्टीभित्र अनुशासनहीनता मौलाउँदै गएको चर्चा गर्दै प्रजातन्त्र स्थापना भएको ७ दशक पूरा हुँदासमेत वीपीले देखेको सपना पूरा नहुनु विडम्बना भएको बताउनुभयो ।
कार्यक्रममा नेपाली कांग्रेस मोरङका वरिष्ठ नेता वसन्त भट्टराई, मोरङ कांग्रेसका सभापति डिगबहादुर लिम्बू, उपसभापति भक्तिनाथ माझी, सचिव मोदराज घिमिरे, पूर्वकोषाध्यक्ष गोपाल थापा, महिला संघकी अध्यक्ष शान्ता रिजाल, विराटनगर कांग्रेसका सभापति दीपक चापागाईं, वडा नम्बर ६ का सभापति राम ढकाल, प्राध्यापक मनोज साहलगायतले वीपीले देखाएको बाटोमा हिंडाउन सके कांग्रेसलाई कसैले पराजस्त गर्न नसक्ने विचार राख्नु भएको थियो ।