कुमोद अधिकारी
१३ साउन,
विराटनगर । कोशी प्रदेश सरकारले सुनसरीको देवानगञ्ज घटनामा ज्यान गुमाउनेको परिवारलाई २ लाख रुपैयाँ राहत दिने भएको छ ।
सुनसरीको देवानगञ्ज ३ कप्तानगञ्जमा दुई समुदायवीच भएको झडपका क्रममा गोली लागेर २४ बर्षिय ओमप्रकाश मेहताको ज्यान गएको थियो ।
प्रदेश सरकारको आज आह्वान गरेको सर्वपक्षीय बैठकमा कोशी प्रदेसका मुख्यमन्त्री हिक्मतकुमार कार्कीले मृतकका परिवारलाई २ लाख र सो घटनामा परि घाइते भएका तथा आगजनीबाट घर र पसलमा क्षति पुगेकाहरुलाई ५०÷५० हजारका दरले राहत उपलब्ध गराउने जानकारी दिनुभयो ।
सर्वपक्षीय बैठकले विभिन्न ८ बुँदे निर्णय समेत गरेको छ । बैठकले घटनामा मृत्यु भएका ओमप्रकाश मेहताप्रति श्रद्धाञ्जली व्यक्त गर्दै शोकसन्तप्त परिवारप्रति समवेदना प्रकट गरेको छ । साथै घाइतेहरूको शीघ्र स्वास्थ्यलाभको कामना गरेको छ ।
सामाजिक सद्भाव र साम्प्रदायिक एकता कायम गर्न राजनीतिक, सामाजिक तथा प्रशासनिक पक्षले समन्वयात्मक पहल गर्ने, पालिका तहमा सर्वदलीय तथा सर्वपक्षीय बैठक आयोजना गरी सद्भाव अभिवृद्धिका कार्यक्रम सञ्चालन गर्ने वैठकले निर्णय गरिएको छ ।
यस्तै, सामुदायिक तहमा मेलमिलाप र सद्भाव कायम गर्न स्थानीय प्रशासनसँग समन्वय गरी सद्भाव यात्रा तथा सार्वजनिक अपिललगायतका कार्यक्रम सञ्चालन गरिने भएको छ ।
बैठकले सबै धार्मिक समुदायका संघ–संस्थाले संयुक्त अपिल जारी गर्दै समन्वय र सहजीकरणमा भूमिका खेल्नुपर्ने, सीमाक्षेत्रबाट हुन सक्ने अवाञ्छित गतिविधिप्रति सुरक्षा सतर्कता अपनाउने तथा घाइतेको उपचार र मृतकका परिवारलाई राहत उपलब्ध गराउन संघीय सरकारसँग अनुरोध गर्ने निर्णय पनि गरेको छ ।
यसैगरी, घटना प्रभावित जिल्ला तथा आसपासका क्षेत्रमा यस्ता घटना दोहोरिन नदिन सुरक्षा व्यवस्थापन प्रभावकारी बनाउन सम्बन्धित जिल्ला प्रशासन कार्यालयलाई आवश्यक समन्वय गर्न आग्रह गरिएको छ ।
सर्वपक्षिय बैठकमा बैठकमा राष्ट्रिय स्वतन्त्र पार्टीका प्रदेश अध्यक्ष चन्द्रबहादुर राई, नेपाली कांग्रेसका प्रदेश सभापति उद्धव थापा, नेकपा एमालेका प्रदेश अध्यक्ष घनश्याम खतिवडा, नेकपाका कुसल लिम्वु, राप्रपाका अशोक पौडेल लगायत दलका प्रतिनिधि एवं प्रदेशस्तर स्तरका सुरक्षा निकायका प्रमुखको सहभागिता थियो ।